CAPIZ-Ginapadayon sang Provincial Veterinary Office (PVO) sang Capiz, sa pakig-angot sa mga Local Government Unit (LGU) kag Municipal Agriculture Office (MAO), ang mass rabies vaccination drive para sa mga ido kag kuring sa nagkalain-lain nga barangay sa probinsya.
Kabahin ini sang padayon nga kampanya sang probinsya agud maprotektahan ang mga alagang sapat kag mapunggan ang paglapta sang rabies, isa ka makamatay nga balatian nga mahimo matakod sa tawo paagi sa kagat ukon kalmot sang infected nga sapat.
Suno sa PVO, magapadayon ang vaccination drive sa nagkalain-lain nga lugar sa Capiz, lakip ang Dapdapan sa Sapian sang Setyembre 10; atubang sang Provincial Capitol sa Setyembre 14; Angub sa Cuartero sa Setyembre 15; kag San Nicolas sa Tapaz sa Setyembre 17.
Magaserbisyo man ang vaccination team sa Poblacion, Dao sa Setyembre 18; Mahunodhunod, Cuartero sa Setyembre 22; Carataya, Cuartero sa Setyembre 24; Poblacion Ilaya, Dumarao sa Setyembre 25; Agnaga, Cuartero sa Setyembre 28; kag Atiplo, Mambusao sa Setyembre 30.
Ginapangabay ang mga tag-iya sang ido kag kuring nga magpakig-angot sa ila tagsa ka LGU ukon Municipal Agriculture Office para sa dugang nga impormasyon kag detalye nahanungod sa vaccination schedule kag lugar.
Pinaagi sa regular nga pagbakuna sang mga alagang sapat, ginapabaskog ang proteksyon batok rabies kag ginapalapit ang Capiz sa handum nga mangin rabies-free nga probinsya.
