Nagapadayon ang mass rabies vaccination drive sang Provincial Veterinary Office sang Capiz sa nagkalain-lain nga mga barangay sa probinsya agud mapataas pa ang numero sang mabakunahan batok sa rabies.
Sa interview sang Bombo Radyo kay Dr. Cheyslee C. Descalsota, Veterinarian III sang Provincial Veterinary Office, iya ginpahayag nga house-to-house ang ila ginapatigayon nga pagbakuna, ilabi na sa mga hinuptan nga ido kag kuring.
Suno kay Descalsota, ang mga kwalipikado nga mga hinuptanan nga ido kag kuring para sa bakuna amo ang tatlo ka bulan ang edad pataas kag yara sa maayo nga kondisyon ukon wala sang balatian.
Para naman sa mga adult nga sapat nga nakabaton na sang una nga bakuna, kinahanglan ang booster vaccination.
Dugang pa sang natungdan, importante ang regular nga pagbakuna sang mga sapat agud malikawan ang rabies infection.
