ROXAS CITY – Nagapadayon ang pagpatigayon sang mass vaccination ukon ang pagbakuna sa mga hinupatan nga ido kag kuring sa nagkalain-lain nga mga kabanwahanan sa probinsya sang Capiz.
Sa interview sang Bombo Radyo kay Dr. Leonel Abordo, Provincial Veterinarian ginsiling sini nga nagsugod ang ila aktibidad sadtong bulan sang Mayo tubtob subong.
Suno kay Abordo, ang bakuna nga ila ginagamit sa karun ang nagikan sa nabilin nga vials sadtong katapusan nga quarter sang tinalikdan nga tuig, sa diin may yara sang 2,000 vials nga gingamit apang wala ini naubos.
Ginklaro sini ang isa ka vials ang kabaylo sang 10 ka dose, apang indi sa gihapon sini malab-ot ang target nga 70% nga kinahanglan mabakunahan.
Mahibaluan nga ba-se sa ila datos may yara sang 63,000 nga mga ido ang bilog nga probinsya.
Dugang pa sang Provincial Veterinarian, sumugod pa sadto wala sang bastante nga bakuna para sa anti-rabies ang probinsya gani, panugyan sini sa mga nagahupot sang ido kag kuring nga sa tion may yara sang ginatan-ay nga libre nga pagpabakuna sa mga kasapatan kuhaon kun tani in inga tion.
Magluwas sa pagpabakuna, may man suno diri nga pamaagi agud makontrol ang rabies sang isa ka ido, una kinahanglan nga nakakulong ini ukon indi makaguha sa mga kudal, pinaagi sini, indi gilayon nga malatnan ang ido sang rabies.
Bangud sini may yara na sang pila ka mga kabanwahanan ang nakapatigayon na sang mass vaccination kalakip na diri ang banwa sang Dumarao, Cuartero kag Maayon.
Panugyan sini sa mga nagahupot sang ido ukon kuring nga pabakunahan na ila mga hinupatan bangud dako ini nga bulig sa isa ka tawo sa tion nga makagat.
