ROXAS CITY – Nagpahanumdum ang tagpamaba sang Department of Health-Capiz angut sa ka-importansiya sang pagpabakuna sa mga kabataan kontra sa measles-rubella kag oral polio vaccines.
Ginpahayag ni Mr. Joeffrey Espiritu, target sang ahensiya nga mabakunahan ang 95 porsyento sang mga kabataan nga bag-ong bun-ag tobtob 59 ka bulan ukon zero tobtob 9 months old sa probinsiya sang Capiz.
Magasugod ang vaccination program sang ahensiya sa Pebrero 1 para sa measles-rubella kag oral polio vaccines.
Katuyuan sang programa nga mapabaskog ang immunity level sang mga kabataan kontra sa amo nga mga balatian.
Nagpanawagan man si Espiritu sa publiko labi na sa mga ginikanan kag guardians nga suportahan ang kampanya sang gobyerno, bangud ginahimo ini nga tikang agud matapna ang posible outbreak.
Patigayunon ang massive immunization sa mga rural health centers, barangay health centers ukon mahimo man nga magpahamtang sang temporary sites ukon magpang-house to house vaccination ang gintukod nga vaccination team, agud masiguro nga wala sang malimtan nga mga kabataan.
Ginpasiguro man ni Espiritu ang publiko nga ang libre nga vaccine nga ginagamit sa immunization campaign batuk sa measles-rubella kag polio ang safe kag epektibo.
