MANILA, Philippines – Ginbalhin sa kustodiya sang Bureau of Corrections “BuCor”, sa Muntinlupa City si anay pulis Rafael Dumlao III, nga gintudlo sang korte nga mastermind sa pagpatay sang South Korean businessman nga si Jee Ick-joo sang tuig 2016.
Sandig sa Criminal Investigation and Detection Group–National Capital Region ukon CIDG-NCR, ginpatuman ang pagbalhin sang Miyerkules base sa mittimus order nga ginpagwa sang Court of Appeals sang Hunyo 9.
Antes sini, yara si Dumlao sa PNP Custodial Center sa Camp Crame kag nadakpan liwat sa Quezon City matapos ang tatlo ka semana nga surveillance operation.
Suno sa rekord sang kaso, gin-abduct si Jee Ick-joo sang mga pulis sang Oktubre 18, 2016 sa iya balay sa Angeles City, Pampanga sa idalom sang gina-alegar nga anti-drug operation.
Gindala ang biktima sa Camp Crame kun sa diin siya ginpatay, samtang ginsunog naman ang iya bangkay sa isa ka punerarya.
Nahibaluan nga una nga ginpawala sang sala si Dumlao sang mababa nga korte, apang ini ginkanselar sang Court of Appeals.
Sa karon nahibaluan nga ulihi, ginpamatud-an sang Korte Suprema ang iya pagkasala, nga nagresulta sa pagpagwa sang mittimus order sa iya pagbalhin sa pasilidad sang BuCor.
