Ginhanda na sang Davao Region PNP ang tubtob 200 ka kaso batuk sa mga protector ni Kingdom of Jesus Christ founder Apollo Quiboloy.
Suno kay Davao Police Regional Office (PRO 11) Regional Director Police Brig. Gen. Nicolas Torre III, ginbug-os sang pulisya ang tanan nga mga mahimu isampa nga kaso batuk sa mga tagasuporta ni Quiboloy na nangin rason kun ngaman nadugayan ang pagpangita sa kontrobersyal nga pastor.
Suno kay Torre, ginmanduan na niya ang mga police director nga yara sa idalum sang Davao Region PNP nga maghanda sang tubtob napulo nga kaso sa tagsa ka indibidwal nga natumod nga nagbulig sa pagpanago ni Quiboloy.
Magluwas sa mga suporter, magafile man suno ang pulisya sang mga kaso batuk sa mga indibidwal nga may impormasyon angut sa ginataguan ni Quiboloy apang gintuyo nga indi makig-angut sa PNP kag gintuyo nga itago ang nasambit nga impormasyon sa PNP.
Kalakip sa mga kaso nga ginfile batuk amo ang obstruction of justice, disobedience, kag iban pa.
Samtang, magapasaka man ang pulisya sang separado nga sedition charge batuk sa mga miyembro sang KOJC nga nakibahin sa natabu nga blockade uko pagharang sa Carlos P. Garcia highway sadtong August 25.
Ang nasambit nga karsada amo ang dalan padulong sa KOJC compound.
Pila ka personalidad na ang ila natumod, kalakip na ang isa ka retirado nga army general.
Suno kay Torre, gamiton sang pulisya ang mga video kag laragway nakuha sa kasagsagan sang PNP operation gamit ang mga body camera.
