Kapin sa P4 million nga balor sang ecstasy kag heroin ang nakumpiskar sang Bureau of Customs.
Suno sa BOC, nakumpiskar nila ang P4.43 million nga balor sang druga sa Ninoy Aquino International Airport (NAIA).
Anum ka mga parsela ang na-intercept sa Central Mail Exchange Center sang airport, sa diin sang ginbuksan, 1,330 ka ecstasy pills kag 362 grams sang heroin ang nabuyagyag.
Dugang pa sang BOC nga ang nasambit nga iligal nga druga ang naghalin sa Ireland, Netherlands kag Thailand kun sa diin ini ang gindeklarar bilang skincare products kag plumbing materials.
Suno kay Customs Commissioner Bienvenido Rubio, ang nasambit nga operasyon ang kolaborasyon sang Philippine Drug Enforcement Agency (PDEA) kag NAIA Inter-Agency Drug Interdiction Task Group (NAIA-IADITG).
Gintugyan na sang BOC sa PDEA ang iligal nga druga samtang nagapadayon ang imbestigasyon sang mga otoridad.
