Mataas nga opisyal sang rebelde nga grupo ang isa sa mga napatay sa engkwentro batuk sa mga militar sa Binalbagan, Negros, Occidental.
Sa interview sang Bombo Radyo kay Captain Jessie Jun Ebalan, Chief sang 3rd Infantry Divison Public Affairs Office sang Philippine Army, iya gin pahayag nga ang isa sa mga napatay amo si Reynaldo Elecre alyas Amik, ang ginakabig Secretary sang Komiteng Rehiyon Negros.
Suno kay Ebalan, ini ang anay man commanding officer sang regional strike force sang grupo kag mahimo ang yara man sa likod sang plano kuntani nga pagsabotahe sa mga development program sa nasambit nga lugar.
Pahayag pa niya, ang ini nga insidente ang makabig nga kadalag-an sa bahin sang militar bangud makabulig ini agud nga maganyat pa ang iban nga mga rebelde nga magpanaog na kag magsurrender.
Nahibaluan nga sang tinalikdan nga Enero 30, 2026, duha ka mga engkwentro ang nagluntad sa Barangay Biao, Binalbagan Negros Occidental nga madasig man nga gin-respondehan sang 94th Infantry Battalion sang Philippine Army nga nagresulta sa kamatayon sang isa sa may matag-as nga papel sa grupo.
Dugang pa sang natungdan, sa subong padayon ang pagbantay sa lugar kun sa diin nagluntad ang amo nga engkwentro agud nga mapabilin ang kalinong kag katawhay sang palibot.
