Ginpasalig sang Department of Agriculture (DA) nga maga-amat-amat na nga maganubo ang presyo sang pila ka mga ulutanon sa subong nga semana.
Pahayag ni DA Assistant Secretary Arnel de Mesa, spokersperson sang Department of Agriculture, nagsugod na ang harvest sa rehiyon sang Southern Tagalog, may palaabuton ini nga epekto sa presyo sang mga produkto sa pila ka mga inadlaw.
Matandaan nga isa sa nadiparahan nga nagsaka halin sang nagliligad pa nga mga semana, amo ang kamatis nga kun sa diin sa Metro Manila, nagatupa na ang presyo sini sa balor nga P140-P200 ang kada kilo. Sa pila ka mga merkado publiko sa probinsya sang Capiz, yara na ang presyo sini sa P140 ang kada kilo.
Sang damlag lang, una na nga ginpaathag sang farmers’ group nga Philippine Chamber of Agriculture and Food Inc. nga magapabilin nga mataas ang presyo sini subong nga tyempo sang tig-ululan sa pungsod.
Ang iban pa nga mga ulutanon nga nakitaan sa pagsaka sa presyo amo ang carrots, talong, bell pepper, kag iban pa.
Suno sa ahensya, ang pagmahal sang presyo sa pila ka mga panakot kag ulutanon, ini ang bangud sa pag-ilis sang tyempo, magluwas sa nangin epekto sang El Niño phenomenon, nagdugang pa diri ang na-eksperyensyaran nga Bagyo Aghon.
Kalakip man sa mga ginalantaw nga factor amo ang tayuyon man nga nagasaka nga presyo sang gatong nga nagaka-epekto man sa plete sang mga mangunguma ilabi na ang agricultural products halin sa mga malayo nga lugar kaangay sang Benguet, Baguio, kag Southern Tagalog.
