ROXAS CITY – Ginpahayag ni board member Jose Fulgencio ‘Pepe’ Del Rosario ang rason sa temporaryo nga pagsuspendi sang Gobernador sa quarry operation sa probinsya.
Sa interview sang Bombo Radyo kay Del Rosario nga amu ang chairman sang Committee on Environment, suno diri nga luyag lamang ni Governor Fredenil ‘Oto’ Castro nga maprotektahan ang environment batuk sa mga gulpi nga pagbaha kag iban pa nga kalamidad.
Wala man suno diri sang kabalak-an ang mga negosyante nga may naga-eksister nga permits, bangud luyag lamang sang gobernador nga magbutang sang sistema pag-abot sa quarry operation.
Naintindihan man sang mga opisyal nga may mga tawo nga ginasaligan ang pangbalas bilang palangabuhianan, apang indi man puwede nga i-sakripisyo ang aton palibot.
Sa karon, natalana nga magapaguwa sang special permits, posible sa masunod nga semana, ang gobyerno probinsyal para sa mga naga-comply sang pagsulondan sa pag-quarry, sandig sa ginpasa nga assessment report sang gintunga nga grupo sang Sangguniang Panlalawigan nga nagtutok sa amu nga butang.
