Ginakabig sang alkalde sang Sigma nga may lamud pamulitika ang kaundan sang priviliege speech ni Sangguniang Bayan Member Norman Marcelino angut sa gindalahigan nga aksidente sang tatlo ka mga salakyan nga ginapanag-iyahan sang LGU-Sigma.
Ginpahayag ni Mayor Christopher Andaya kun wala nagapamulitika ang iya mga kasumpong ngaa subong lamang sila nagka-interes kag ginpaagi pa sa diskurso pribilihiyo.
Mahimo man sila makapamangkot ukon ma-tsekyar mismo sa motorpool ang Honda CRV, Ford Ranger kag Nissan Terra nga salakyan nga nadalahig sa aksidente sa banwa sang Panit-an kag Barangay Mianay, Sigma, Capiz.
Ginhatagan man sini sang paathag ang gintunaan sang pagka-aksidente sang Honda CRV nga salakyan nga naglapaw sa karsada sa Panitan samtang ang Nisan Terra naman naaksidente bangud sa kantilado nga dalan.
Nahibaluan nga ang Honda CRV na-purchase sang panahon pa sang iya iloy nga si former Mayor Mary Andaya.
Apang ginklaro ni Mayor Andaya nga natigayon nga mabayaran sang insurance ang damages sa mga salakyan nga tuga sang aksidente.
Ginhangkat man sini ang nagahingabot sa iya nga magreklamo lamang sila bangud iya ini paga-atubangon.
Samtang gin-ako ni Andaya nga nagabulang ini sadto kag kun kaisa nagapadul-ong sa bulangan gamit ang salakyan sang gobyerno.
Apang sa pagsugod sang pandemya wala na ini nagabulang bangud hugot ini nga ginadumilian.
