ROXAS CITY – Nagalikaw sa paghatag sang komento ang alkalde sang banwa sang Sigma matapos ginakunsidera ang ila banwa nga potential site para sa pagatukuron nga clustered sanitary landfill sang gobyerno probinsiyal.
Sa pagpangusisa sang Bombo Radyo nagaguwa nga indi luyag magbuhi sang komento ni Mayor Christopher Andaya may kaangtanan sa amo nga isyu bangud wala pa sang pormal nga pag-estoryahanay sa ila kun diiin posible ang lugar sa Sigma nga pahamtangan sang nasambit nga landfill.
Bisan mga Sangguniang bayan members sang banwa sang Sigma ang nagapamalibad nga maghatag sang komento bangud nabatian lamang nila ini nga isyu, apang wala pa direkta nga ginapalab-ot sa ila sang natungdan nga opisyal.
Apang nahibaluan nga operational ang material recovery facility (MRF) sa Sigma nga ila ginahabuyan sang basura.
Ginpasiguro sang gobyerno probinsiyal ang pagpahamtang sang clustered sanitary landfill agud maluwas ang mga kabanwahanan nga wala sang ikasarang nga magtukod sang ila kaugalingon nga sanitary landfill.
