ROXAS CITY – Ginpasalig sang alkalde sang banwa sang Dumarao ang padayon nga paghatag sang relief packs para sa mga pumuluyo nga apektado sang ginapatuman nga Enhanced Community Quarantine bangud sang coronavirus disease (COVID-19) pandemic.
Ini ang ginpahayag ni Mayor Edgardo Arancillo sang mainterview sang Bombo Radyo.
Suno kay Arancillo nga sang nakaligad pa nga duha ka semana sang ila ginpanghatag ang una nga hugnat sang relief packs para sa mga pumuluyo sa 33 ka mga kabaranggayan sa nasambit nga banwa.
Kaundan sang relief packs ang bugas, sardinas, noodles, kag mga disinfectant products.
Ginpahayag sang alkalde nga may kapin sa 1.8 milyones pesos nga pondo ang banwa para sa ila relief operations kag may nabilin pa diri nga gamiton para sa ikaduha nga hugnat sang igahatag nga relief packs sini nga bulan sang Abril.
Dako man ang pagpasalamat sang alkalde sa mga kabaranggayan sa pag-partenisir sang pondo sang ila barangay para sa relief operations.
Ginpasalig man sini nga pagagamiton sang banwa ang igahatag nga P1 milyon sang gobernador sang probinsiya para sa relief operations kag bulig para sa mga frontliners sa banwa sang Dumarao.
Samtang, ginpahayag sang alkalde nga ila na nga ginapreparahan ang pagpanghatag sang ayuda para sa mga kwalipikado nga benepisyaryo sang Social Amelioration Program (SAP) sang Department of Social Welfare and Development (DSWD).
Ini ang kasunod sang pag-release na sang DSWD-Region 6 sang pondo para sa nasambit nga ayuda sa lokal nga gobyerno sang Dumarao.
Mahibaluan nga matapos makadihon sang Memorandum of Agreement (MOA) kag makasumiter sang budget proposal sang LGU, mahimo na mahatag ang nasambit nga bulig-pinansiyal para sa mga kwalipikado sini nga mga benepisyaryo.
Mahibaluan nga sandig sa report sang DSWD, may yara sang 8, 215 household beneficiaries ang banwa nga mga non-Pantawid Pamilyang Pilipino Program (4P’s) kag may 2, 504 ka mga (4P’s) beneficiaries.
