ROXAS CITY – Ginkilala ang maayo nga nahimuan sang isa ka tricycle driver nga sang damlag lang nangin viral sa social media matapos ginbalik ang sling bag sang pasahero nga nagaunod sang kuwarta kag iban nga kagamitan.
Sa flag raising and awarding ceremony sang gobyerno sang syudad, ginhatagan sang pasidungog ang tricycle driver nga si Melvin Lumbo 38-anyos sang Purok 1, Barangay Libas, sining syudad sang pamunuan sang Roxas City government sa pagpanguna ni Mayor Ronnie Dadivas.
Ginpahayag ni Mayor Dadivas, ang kasubong ni Lumbo ang dapat pamarisan nga wala nag-interes sa butang nga wala sini ginapanag-iyahan.
Nagapanindugan pa ang alkalde nga si Lumbo ang isa ka sahi sang empleyado nga ginapangita sang gobyerno sang syudad.
Gintanyagan man sang opisyal si Lumbo sang trabaho sa City hall kun luyag sini nga magtrabaho sa gobyerno.
Agud mapakita sang gobyerno sang syudad ang pagpasalamat sa mabinulawanon nga tagipusoon ni Lumbo, ginhatagan ini sang cash kag groceries.
