ROXAS CITY – Ginkumpirma ni Mayor Ronnie Dadivas ang kooperasyon sang mga negosyante sa ginapangatubang nga sitwasyon sang Roxas City kasunod sa pagpaidalum na sa general community quarantine sang syudad sang Roxas.
Ginpahayag sang alkalde nga ginhimo sang mga negosyante ang pagpasalig sa ginpatawag nga sinapol sa diin gintambungan ini sang madamo nga mga negosyante humalin sa nagabaligya sang bugas, manok, utanon, baboy kag iban pa.
Nagtambong man ang Department of Trade and Industry kag ang mga tag-iya sang mga botika.
Suno kay Dadivas nga luyag lamang sini masiguro nga indi mabutang sa alang alang ang nagapanguna nga kinahanglanon sang mga pumuluyo sa syudad, bangud mangin mabudlay ang pagbiyahe kag maapektuhan ang delivery sang mga produkto sa karon kag palaabuton nga mga inadlaw.
Bangud diri, ginpasiguro sini sa mga pumuluyo sang Roxas City may nagakaigo nga supply sang prime commodities.
Nagpangabay man ini sa publiko nga indi magpanic buying bangud wala sang rason para kumprahon ang tanan nga mga balakon, bangud kinahanglan nga panumdumon nga may iban man nga nagakinahanglan.
