ROXAS CITY – Gintawag naman ni Mayor Ronnie Dadivas nga one sided, malisyoso kag wala sang balasehan ang isa ka artikulo sang The Daily Guardian nga kasubong ginalapas sang alkalde ang guidelines sang Inter Agency Task Force on Emerging Infectious Diseases (IATF-EID) matapos nga gina-upangan ukon gina-delay ang delivery sang mga essential goods sa pagsulod sa syudad sang Roxas.
Ginaalegar nga napagkit man sa artikulo nga sa pihak sang madamo nga mga notisya kag reminders sa alkalde nagpakatig-a ini nga magsunod sa pagsulundan.
Gintadlong man ni Mayor Dadivas ang kaundan sang nasambit nga artikulo, sa diin suno diri nga wala siya sang nabaton nga anuman nga notisya ukon reminder gikan sa Capiz PPO ukon sa DILG.
Ang nabaton lamang sini nga sulat ang gikan sa Regional Office sang PRO-6 nga gilayon man sini ginsabat.
Ginpresentar ni Dadivas ang sabat sa nagluntad nga insedente sa border checkpoint sa diin nagpadulong si Capiz PPO Provincial Director Julio Gustilo Jr. kag gin-akigan ang mga kapulisan sa lugar bangud sa ginaalegar pag-upang sa mga delivery trak nga nagakarga sang essential goods sa syudad sang Roxas.
Ginapanindugan sang opisyal nga wala gina-upangan ang pagsulod sang mga truck nga may karga nga mga basic commodities, kundi ginasunod lamang ang quarantine protocol angut sa border restriction kasubong sa pagpaidalum sa driver kag pahinante sa thermal scanning.
Suno kay Dadivas nga matapos ang insedente, gintake-over na sang joint task force nga ginalakipan sang PNP, AFP, BFP ang pagpatigayon sang border security checkpoint akg wala na sang kasubong nga report nga natabo.
Samtang kumpyansa naman si Dadivas kun nabasa lamang ni Police Brig. General Rene Pamuspusan ang kaundan sang iya sulat nga may yara sang attachment, makita sini nga ginaba-se sini ang tikang sa mga polisiya sang gobyerno.
Samtang malipayon nga gin-anunsyar ni Dadivas nga nagnubo na ang numero sang mga PUM’s, sa diin isa na lamang ang PUI, 3 ang naka-home quarantine kag madamo na ang na-terminate nga mga PUM’s.
Isa lamang ini ka indikasyon nga maayo ang pagpatuman sang anti coronavirus preventive measure sang gobyerno.
