ROXAS CITY – Aminado ang alkalde sang syudad nga iya naintiendihan ang nabatyagan sang mga benepisyaryo sang social amelioration program (SAP) nga nagdinaguso kahapon sa mga payout centers para makuha ang cash assistance nga P6,000 gikan sa Department of Social Welfare and Development (DSWD) sa pagkabalaka nga kahapon na ang last day sang distribution.
Suno kay Mayor Ronnie Dadivas nga matapos nakalab-ot sa ila atensyon nga wala na gina-obserbar ang social distancing sa payout center, gilayon nagresponde ang mga kapulisan, BFP, City Disaster Risk Reduction and Management Office kag iban nga law enforcement agencies tobtob nangin maayo na ang dalagan sang distribusyon.
Aminado ang alkalde nga ila naestoryahan nga ipang-house to house ang distribusyon sang SAP, apang imposible ini bangud gamay lamang ang manpower sang ahensiya kag mabudlay para sa empleyado sang gobyerno nga limitado man ang ila personnel.
Bangud diri nadesisyunan nga magapahamtang sang payout center kag diri patigayunon ang distribution sang ayuda sa mga benepisyaryo.
Nagalaum man ang alkalde nga indi na masulit ang indi pagsunod sa social distancing sa pagpadayon subong nga adlaw sang distribution sa iban nga kabaranggayan nga wala natapos kagab-i. Nag-apelar man si Dadivas sa publiko nga magkooperar kag magsunod sa instruksyon sang mga opisyales sa barangay agud malikawan ang COVID-19
