ROXAS CITY – Ginsabat na sang alkalde sang syudad ang pila ka mga kontrobersiyal nga isyu angut sa ginaalegar paglapas sini sa pila ka mga pagsulundan sang Inter Agency Task Force on Emerging Infectious Diseases (IATF-EID).
Ginpahayag ni Mayor Ronnie Dadivas nga wala sang ginlapas nga guidelines sang nasambit nga task force ang gobyerno sang syudad kabaliktaran sa mga ginapatuto nga akusasyon sa iya.
Ginapanindugan sini nga bisan san-o wala ginaharangan ukon gina-upangan ang pagsulod sang mga essential kag non-essential goods sa syudad.
Apang ginapatuman lamang ang hugot nga quarantine protocols bilang proteksyon sa mga pumuluyo sang syudad batuk sa makamamatay nga coronavirus disease 2019 (COVID-19).
Suno pa sa alkalde kun gina-upangan ang delivery sang mga basic goods, ginakulang na kuntani sa karon ang supply nga kinahanglanon sang mga pumuluyo sa syudad.
Gin-athag pa ni Dadivas kun istrikto man sa pagpatuman sang mga health protocol sa border security patrol, tuyo lamang sini nga indi makalusot sa syudad ang mga indibidwal nga nagasuprer sang amo nga balatian, agud indi mabutang sa risgo ang syudad.
Magluwas diri, suno sa opisyal nga antes ginpaguwa ang Executive Order No. 12 ni Governor Esteban Evan Contreras II nga nagapatuman sang enhanced community quarantine sa probinsiya, ang ginasunod pa nga pagsulundan sa mga border security checkpoint amo ang nauna nga EO sang probinsiya sa diin gina-require man sang health certificate nga gikan sa ila ginhalinan ang nagasulod nga mga drivers sang delivery truck bilang pamatood nga indi sila PUM ukon PUI sa ginhalinan nga lugar.
Kumbinsido si Dadivas nga nagakaigo man ang ginhimo sang mga border security patrol bangud nagaba-se lamang sila sa napagkit sa EO.
