ROXAS CITY – Ginlibot ni Roxas City Mayor Ronnie Dadivas ang mga barangay nga apektado sang bagyo Opong.
Sa interview sang Bombo Radyo kay Mayor Dadivas, iya ginpahayag nga ginbisita kag gintsekyar niya ang kahimtangan sang mga evacuees dala ang mga food packs nga kinahanglanon.
Suno sa iya, mas maayo nga mag-evacuate na lang ang mga pumuluyo ilabi na kun yara ang mga ini sa danger ukon hazard zone agud malikawan ang ano man nga insidente.
Pahayag pa sang alkalde, indi na paghulaton pa nga karon sa gab-i ukon magbaskog liwat ang ulan kag amo ang pag-evacuate bangud mabudlay ini nga respondehan.
Dugang pa sang natungdan, nakahanda ang mga barangay hall, multipurpose hall kag mga eskwelahan nga magaserbe nga evacuation centers sang mga kabarangayan sa syudad.
