ROXAS CITY – Wala pa sang ihibalo si City Mayor Ronnie Dadivas sa plano nga pagpahamtang sang quarantine facility sa siyudad sang Roxas para sa mga ‘asymptomatic’ patients nga nagpositibo sa coronavirus disease (COVID-19).
Sa interview sang Bombo Radyo sa alkalde, ginpahayag sini nga nagapati siya nga kinahanglan may yara sang ‘proper coordination’ sa iya ang amo nga plano bilang local chief executive sang siyudad.
Kinahanglan suno sa iya masiguro nga ipahamtang ang mga ‘asymptomatic’ patients sa isa ka indi matawo nga lugar agud indi mabutang sa risgo ang ikaayong lawas sang mga pumuluyo.
Nakahanda naman nga maghulat si Dadivas para sa pagpalab-ot sa iya sang komunikasyon natuhoy sa amo nga plano apang nagakadapat pa ini nga hinalaan suno sa iya.
Apang nagpanindugan ang alkalde nga sa iya tanan nga desisyon, ginapamatian sini ang interes sang kadamuan nga pumuluyo.
Matandaan nga una nga ginpahayag ni Capiz Governor Esteban Evan ‘Nonoy’ Contreras sa Bombo Radyo nga plano sini nga himuon nga provincial quarantine facility para sa ‘asymptomatic’ patients ang Sancta Maria, Mater et Regina, Seminarium, formerly St. Pius X Seminary sa Barangay Cagay, Roxas City.
Sang ginlab-ot naman sang Bombo Radyo ang Archdiocese of Capiz, nagpanindugan ini sa pagpamalabag sa amo nga plano kag ginsuhestiyon nga ang Colegio de la Purisima Concepcion-Calipayan Campus na lamang ang gamiton para diri.
