ROXAS CITY – Nagapati si mayor-elect Katherine Kit D. Belo nga bangud sa iya sensiredad sa pagserbisyo sa ila banwa ang rason nga liwat nagsalig ang mga pumuluyo sang Panitan kag nagdala sa iya sa kadalag-an.
Ini ang ginpahayag ni Mayor Belo sang mainterview sang Bombo Radyo.
Suno kay Belo, nga sa pihak sang iya kadalag-an, nasubuan naman ini bangud may isa sa ila nga miyembro sang partido ang napaslawan nga makasulod sa pagka-SB member.
Dako man suno diri nga bentaha, bangud ang bag-o nga gobernador kag bise gobernador sang probinsya ang iya man kapartido kag nagalaom ini nga mabuligan gid ang ila banwa.
Ginpahayag ni Belo, nga pagapadayunon niya ang iya mga naumpisahan kag lauman sang mga pumuluyo ang mga bag-o nga proyekto nga iya igatukod agud sa pag-umwad sang Panitan.
Tuman gid sini ang pagpasalamat sa mga pumuluyo sang Panitan nga liwat nagsalig sa iya agud makapadayon sa pagserbisyo.
Ginsiguro man ni Belo nga magaserbisyo ini sang patas mapakontra partido man ukon indi.
