ROXAS CITY – Wala nauyunan sang reelected mayor sang banwa sang Pontevedra ang tinaga nga gingamit sa akusasyon batuk sa iya nga gintraiduran sini si outgoing Governor Antonio del Rosario, rason nga nalutos ini sang nagligad nga eleksyon ni Governor elect Esteban Evan Nonoy Contreras.
Sa interview sang Bombo Radyo kay mayor Esteban Dodoy Contreras, gindepensahan sini ang kaugalingon kag gintadlong ang sala nga tinaga nga gingamit sa iya sang pamilya sang outgoing governor.
Suno kay Mayor Contreras nga bisan san-o wala ini nagtraidor sa grupo, bangud wala nadula ang suporta sini kay anay Interior secretary Mar Roxas kag ginpamatud-an niya ini sang mangin No.1 si Roxas sa banwa sang Pontevedra.
Apang aminado nga wala ini nagcommit nga suportahan ang tanan nga kandidato sang LP.
Aminado man ang alkalde nga pila ka adlaw antes ang eleksyon, nagpakigkita siya kay Roxas kag Mrs. Judy Roxas sa diin nagprangka nga indi sarang nga mapabay-an si Governor elect Nonoy Contreras nga iya anak matapos napamatud-an nga Blood is thicker than Water.
