ROXAS CITY-Ginatugyan ni Roxas City Vice Mayor Erwin Nonoy Sicad sa mga katapo sang mga kapulisan ang pag-imbestigar sa mga ginapahayag mga miyembro sang mga manugtonto nga nambiktima sang isa ka milk tea shop nga gingamit ang pangalan sang amo nga opisyal sa Roxas Avenue, Roxas City.
Sa interview sang Bombo Radyo Roxas kay Sicad ginpahayag sini nga tuman ang kasubo nga iya nabatyagan bangud may yara naman sang nabiktima nga establisyemento kun sa diin gingamit naman ang iya nga pangalan.
Suno kay Sicad nga makig-angut ini sa iban pa nga ahensiya sang gobyerno nga makabulig trace sa mga suspetsado.Dugang pa ni Sicad nga indi nya na luyag pa nga palampason ang amo insidente bangud makapila na ka beses nga gingamit ang pangalan sini sa pagpanunto.
Kadungan sini nagkahangawa man si Sicad sa publiko bangud ginalauman sini nga posible maliwat pa ang amo nga modus ihilabi na nga nagahilapit ang Christmas Season.
Samtang nagpanawagan naman si Sicad sa publiko ihilabi na mga establisyemento komersyal nga mangin alisto sa mga manugtonto sa tion sang kapaskuwahan.
Matandaan nga sandig sa imbestigasyon sang mga kapulisan nga nag-order sang kapin 40 ka bilog nga milktea sa amo nga shop ang mga suspetsado kun sa diin nga nagpakilala ini nga si Vice Mayor Sicad.
Magluwas diri, nagsugo pa ang nagpakilala nga politiko nga pa-loadan ini sa pinakamalapit nga 24/7 convenience store nga nahamtang naman sa Fuentes Drive rason nga gintuman man ini sang empleyado kun sa diin nagdangat sa kapin P116,000.Mahibaluan nga makaduha na kabeses nga gingamit ang pangalan ni Sicad sa pagpanunto sang mga establisyemento subong nga tuig.
