ROXAS CITY – Ginkompirmar sang alkalde sang banwa sang President Roxas nga nakapadulong sa amo nga banwa si Patient No. 33, ang 44 anyos nga lalaki nga nagpositibo sa coronavirus disease (COVID-19) sa Capiz.
Suno kay President Roxas Mayor Receliste ‘Tanoy’ Escolin, nakatambong sa ginpatawag nga sinapol sang banwa sadtong Marso 16 ang amo nga lalaki nga isa ka uniformed personnel sang isa ka national government agency nga na-assign sa banwa sang Pilar.
Ginpahayag ni Escolin nga ang gintambungan ni Patient No. 33 amo ang ginpatawag sini nga sinapol kun sa diin ginhinalaan ang pagahimuon sang lokal nga gobyerno sang President Roxas agud masolusyonan ang problema sa COVID-19 pandemic.
Ginpahayag pa sini nga nag-serbi pa nga speaker sa amo nga sinapol si Patient No. 33.
Sa pagpangusisa sang alkalde sa iban pa nga nakatambong sa amo nga sinapol, ginapahayag nga nagalain na ang pamatyag ni Patient No. 33 sang amo nga adlaw.
Naalarma man ang alkalde bangud sa nasambit nga adlaw, wala pa sang suksok nga face mask si Patient No. 33.
Bangud diri, na-desisyunan sang alkalde nga ipa-disinfect ang municipal building sang banwa kun sa diin ginpatigayon ang sinapol.
Gilayon man nagpatigayon sang contact-tracing ang Rural Health Unit sang President Roxas sa mga nakasugata kag nakahalubilo ni Patient No. 33.
Mahibaluan nga si Patient No. 33 ang tumandok sang Altavas, Aklan nga may travel history sa Metro Manila.
Marso 17, 2020 sang naglain ang pamatyag sini kag Marso 28, 2020 sang ini ang na-confine sa ospital tubtob sa nagguwa sa resulta sang laboratory examination sang Marso 31, 2020 nga positibo ini sa COVID-19.
