ROXAS CITY – Ginpatigayon ang clearing operation sa porsyon sang President Roxas Public market, kaina sang aga, Setyembre 2.
Sa interview sang Bombo Radyo kay Mayor Receliste ‘Tanoy’ Escolin, nagpadulong ini sa merkado publiko agud magpanguna sa clearing operation sa nabilin nga mga puwesto sang duha ka mga negosyante, nga ginhingadlan sini nga sanday Dolores Bieles kag iya iya umagad nga certain ‘Saria’.
Suno sa alkalde, nagligad nga tuig pa ginpatigayon ang clearing operation apang wala ginhawanan sang duha ang amu nga lugar, bangud gina-claim nila nga gindonar sang anay alkalde nga si Locsin, ang duta nga ginahamtangan sang ila puwesto.
Ginklaro sang alkalde nga wala na sang baligya sa ginpangguba nga mga puwesto kag ginahimo nalang nila nga tambakan sang ila gamu-gamu.
Indi suno diri patas sa iban nga mga negosyante nga luyag nga mag-renta sa amu nga puwesto.
Suno pa sa alkalde, nag-agi sa proseso ang pagpatigayon sang clearing operation kag gin-imbentaryo ang mga nakuha sa operasyon.
Gin-updan ini sang ila LGU, President Roxas MPS kag Business Permit and Licensing Office.
Panugyan sang alkalde sa mga negosyante sa ila banwa nga magbayad sang ila responsiblidad agud malikawan nga matabo sa ila puwesto ang ginpatigayon nga clearing operation.
