Mayor Escolin, nag-abiso sa mga pumuluyo sa ila banwa nga likawan ang pagkaon sang panginhason bangud sa red tide

ROXAS CITY – Gin-abisuhan ni President Roxas Mayor Receliste ‘Tanoy’ Escolin ang mga pumuluyo sa ila banwa ilabi na sa mga coastal area nga likawan anay ang pagkaon sang mga produkto nagikan sa dagat bangud sa ginalantaw nga apektado ang amu nga kadagatan sang red tide.

Ini ang ginpahayag ni Mayor Escolin sang mainterview sang Bombo Radyo.

Suno diri, nagpatigayon na sila sang water sampling kag ba-se sa inisyal nga resulta, nakit-an ang indi normal nga estado sang ila tubig-dagat.

Wala man sang nabalhag sa ila banwa nga reklamo natuhoy sa food poisoning.

Matandaan nga magkaiping lamang ang banwa sang President Roxas kag sang Pilar nga sa karon may kapin walo na ka nareport nga nagpalanuka matapos nakakaon sang panginhason.