Ginatugyan na ni Mayor Receliste Escolin sang President Roxas sa mga kapulisan ang imbestigasyon nga may kaangtanan sa narekober nga ginaalegar shabu sa bulsa sang isa ka empleyado sang munisipyo nga nagtaliwan.
Matandaan nga ginkilala ang amo nga persona kay alyas “Joey”, 46-anyos kag residente sang Sitio Kampo, Brgy. Poblacion, President Roxas, Capiz.
Sa interview sang Bombo Radyo kay Mayor Escolin, ginpahayag sini base sa iya pagpangusisa, wala sa drugs watch list sang mga kapulisan ang nasambit nga empleyado. Halos 10 ka tuig man ini nga nangin casual employee sang munisipyo antes nga nangin regular bangud sa kadugayon na sini nga naga-serbisyo kag ulihi nga gindesignar sa RHU sang nasambit nga banwa.
Dugang pa ni Escolin, kada tuig nagapatigayon ini sila sang random drug test sa mga empleyado.
Samtang, sa karon ginpaidalom na sang mga otoridad sa laboratory examination ang ginaalegar 2 sachets sang shabu nga narekober sa bulsa sang amo nga empleyado.
Padayon naman naga-kooperar kag nagapakig-angut si Escolin sa mga otoridad sa nagapadayon nga imbestigasyon.
