PRESIDENT ROXAS, CAPIZ- Nagpanawagan si President Roxas, Capiz Mayor Receliste Escolin sa mga pumuluyo sang banwa nga magkooperar kag magbuligay agud mahagan-hagan ang pagbaha sa banwa kada magbubo ang ulan.
Sa interview sang Bombo Radyo kay Mayor Escolin, iya ginpahayag nga indi lang ang Local Government Unit ang may katungdanan nga masolbar ang problema bangud may parte man ang mga pumuluyo sa paghatag kasolbaran sa pagbaha sa lugar.
Suno sa alkalde, masami nga ginabaha sa kada mag-ulan ang mga kabarangayan nga yara sa lowland areas nga ginalakipan sang Pondol, Aranguel, Poblacion Swa, bahin sang Hanglid, kag Cabugcabug.
Pahayag niya, gamiton kuntani sang pumuluyo ang social media sang responsable sa pagpalab-ot sang concern sa national office kag indi sa pagpakamalaot sa local government.
Pinaagi sini, posible masapakan pa sang mga ahensya sang gobyerno ang amo nga concern kag makapain sang pondo agud masolbar ang problema sa pagbaha.
Nagpanawagan si Escolin sa publiko nga mangin responsable sa paghaboy sang basura agud malikawan nga magbara sa mga kanal ukon drainage nga nagatuga sang pagbinaha.
Interviewed by Bombo Francis Bonete Biñas
