ROXAS CITY – Pila sa mga pumuluyo ang nagpalab-ot sang reklamo bangud sa pagdinamo sang langaw sa mga kabarangayan sa Dumarao, Capiz.
Ini ang ginpahayag ni Hon. Mateo Hachuela, alkalde sang Dumarao sang mapakig-angutan sang Bombo Radyo.
Ginsiling ni Mayor nga gilayon niya gin-aksyunan ang mga reklamo pinaagi sa pagpakig-angut man sa mga poultry farm owners sa nasambit nga banwa.
Ginpadulungan sang Rural Health Unit (RHU) kag Dumarao PNP ang mga tag-iya kag ginhatagan sang pagsulundan ang mga ini agud mapahagan-hagan ang paglapnag sang langaw sa komunidad kun sa diin dako ang posibilidad nga makahalit sa ikaayong lawas.
Nagapasalamat naman ang alkalde bangud nagkooperar ang tatlo ka poultry owners gikan sa Barangay Sagrada Familia, Hibato kag Sibariwan.
Isa sa mga rekisitos suno diri sa mga owners ang magbutang sang perimeter net fence asta sa ibabaw sang poultry agud indi makaguha ang langaw.
Ginsiguro ni Mayor Hacuela nga kun indi matuman ang mga rekisitos, indi man siya mag-isyu sang permit to operate.
