ROXAS CITY – Nagapakig-negosyar na si Mayor Felipe ‘Neri’ Yap, sa isa ka security agency, agud mahamtangan na sang security guard ang Ivisan Public Market.
Ini ang ginkumpirmar ni Mayor Yap, sang mainterview sang Bombo Radyo.
Suno diri, indi matapos subong nga semana, mapahamtangan na ang ila merkado sang magabantay nga sekyu.
Samtang, ginpahayag man sang alkalde nga padayon ang pagpatrolya sang mga Brgy. Tanod sa kabarangayan sang Poblacion Norte kag Poblacion Sur, apang kaisa indi gid mapulong nga ginabantayan man ang mga ini sang mga makawat antes magsalakay.
Ginmanduan man ni Yap ang mga kapulisan sa Ivisan, nga doblehon pa ang ila pagbantay agud indi na malutsan pa sang mga kawatan kag indi na maliwat ang serye sang pagpangawat sa ila banwa.
Nagapangayo man sang pasaylo ang alkalde sa mga magagmay nga vendors, kag ginpahayag nga naintindihan sini ang ila balatyagon, apang nagatinguha man ini kag ila mga opisyal kag ginpasiguro nga nagadihon sang tikang agud makapalab-ot sang financial assistance sa mga nangin apektado sang pagpangawat.
