ROXAS CITY – Nangin madinalag-on ang 100 diyas sa puwesto kag pagserbe sa pumuluyo sang alkalde sang Sapian.
Ini ang ginpahayag ni Sapian Mayor Atty. Joe Villanueva sang ma-interview sang Bombo Radyo.
Ginpakigbahin niya nga madamo siya sang nahimo sa sulod sang 100 ka adlaw sa puwesto kasubong sang pagpauswag sang bantay dagat rason nga madamo nagkaladakpan nga iligal nga nagapanagat; proper waste segregation (no segregation, no collection); systematized educational assistance; pagpakay-o sang classrooms kag stages amu man ang pagpatapan sang dalanon sa pila ka buluthoan; pagpadulong sang RHU sa kabarangayan agud mapalapit ang pagpabakuna; kag gintinguhaan man sini nga mangin masadya ang piyesta bangud sa duwa man ka tuig nga wala ini natigayon.
Kaangut diri, apisar madamo na siya suno diri sang hinimuan indi pa siya kontento sa iya performance bangud madamo siya sang plano nga wala pa na-implementar.
Ginsiguro ni Mayor Villanueva nga tinguhaan niya nga ma-implementar ini tanan apisar madugay ang proseso ilabi na sa pagpakay-o sang imprastruktura.
Natuhoy sa red tide, ginapanugyan sini sa pumuluyo nga likawan anay ang pagkaon, pagbaligya, pagharvest kag pagtransport sang shellfish santo sa abiso sang provincial government.
Ginapasalig sang alkalde sa pumuluyo nga magahatag siya sang bulig sa mga apektado sang red tide nga wala sang pamolitika.
Liwat niya man nga ginapangayo ang padayon nga pagsuporta sang mga Sapianon.
