Magapakighinun-anon si Panay Mayor Jonathan Besa sa contractor sang ginakaayo nga dalan sa Barangay Tico, Panay, Capiz, agud masolusyunan ang mga problema nga nagatuhaw sa ginapatigayon nga road concreting project.
Sa interview sang Bombo Radyo kay Mayor Besa, ginpahayag sini nga ginmanduan na niya ang Municipal Engineer nga makigdayalogo sa kontraktor sang proyekto sa idalom sang Department of Public Wealth and Highways 1st Engineering District.
Ini matapos sang pila ka mga reklamo sa alkalde ang Punong Barangay sang Tico tuhoy sa kahimtangan sang ginakaayo nga dalan.
Suno kay Besa, natalana sa katapusan sang Oktubre ang completion sang proyekto, apang nagapadayon pa ang mga ulubrahon nga nagatuga sang problema sa trapiko kag kabudlayan sa mga commuters.
Ginpasalig naman sang alkalde nga pagatutukan sang iya administrasyon ang madasig nga pagkompleto sang proyekto, upod ang pagseguro sa kaluwasan sang mga pumoluyo nga apektado sang ginapatigayon nga konstruksyon.
Nagalaum siya nga paagi sa pagpakighinun-anon, masolusyunan ang mga problema kag mapahagan-hagan ang kabudlayan sang mga nagagamit sang nasambit nga dalan.
