ROXAS CITY – Ginapanindugan sang presidente sang League of the Municipalities of the Philippine (LMP)-Capiz Chapter nga na-disseminate sang gobernador sa mga local chief executives ang mga ginpapanaug nga Executive Oder kag Memorandum Circular nga ginapatuman sa probinsiya.
Ginpahayag ni Mayor Leodegario ‘’Jun’’ Labao sang banwa sang Mambusao kag nagaserbe nga focal person sang probinsiya nga anuman nga hulag ukon ginahimo nga tikang ni Governor Esteban Evan Contreras II sa probinsiya ang ginapalab-ot sini sa mga alkalde.
Gindepensahan man sang alkalde ang gobernador batuk sa pila ka mga kritiko sa ginaalegar kapaslawan nga matungdan ang iya nga obligasyon.
Suno kay Labao nga nahimo sang maayo ni Governor Contreras ang iya trabaho kag napangitaan sang solusyon ang mga problema nga ginapangatubang sang probinsiya kasubong na lamang sang coronavirus disease (COVID-19).
Samtang ginpahayag ni Mayor Labao nga natigayon na sini nga mapa-print ang format sang Household Quarantine Pass kag gintugyan na sa mga barangay kapitan sang kabaranggayan sa Mambusao .
Suno sa opisyal nga mismo ang mga alkalde ang magapatawag sa mga barangay kapitan nga maga-isyu sang nasambit nga dokumento sa ila mga kasimaryo nga gamiton kun magsugod na ang implementasyon sa probinsiya.
Gindugang pa ni Labao nga ginhatagan man sini sang financial assistance ang kada barangay nga gamiton agud wala na sang makaagi pa sa ila mga boundary.
Gindugang pa sang opisyal nga wala ginapahanugutan sa ila banwa nga makasulod ang wala sang mapakita nga medical certificate, sa diin isa ini ka pamaagi agud indi mabutang sa peligro ang kabuhi sang ila mga pumuluyo.
Samtang suno kay Labao nga mismo nagpasalig si Governor Contreras nga magahatag sang P100,000 ang gobyerno probinsiyal sa kada munisipyo bilang bulig.
