-- ADVERTISEMENT --

Nagpaathag si Naga City Mayor Leni Robredo nahanungod sa nagalapta nga mga picture niya nga nagasuksok sang espesyal nga bayo nga ginagamit sa religious ceremony matapos magtambong sa national convention sa Naga City sang Biyernes, Nobyembre 13.

Sa iya pahayag, ginpahayag sang alkalde nga wala niya anay makumpirmar ang iya pagtambong sa GLMM National Convention nga ginhiwat sa Villa Caceres Hotel bangud may naka-schedule na siya nga mga activity kag meting sa amo nga adlaw.

Apang, nagdesisyon siya nga mag-agi sa nasambit nga event matapos siya ginpahibalo sang iya executive assistant nga madamo nga delegate halin sa iban nga lugar ang nagahandum nga makita siya.

Pag-abot sa hotel, didto na niya nahibaluan nga ginapaabot gali nga maghatag siya sang mensahe para sa mga nagatambong. Bangud wala siya kapreparar sang speech, naghimo siya sang malip-ot nga mensahe samtang yara sa elevator, base sa tema nga nakasulat sa tarpaulin sang convention.

Pagkatapos niya maghambal, ginpangabay siya nga magpabilin sa atubang agud magbaton sang plaque of appreciation ukon tanda sang pagpasalamat. Sa amo man nga tion, ginsuksok sa iya sang guest of honor ang espesyal nga bayo bilang pagpakita sang pagpasalamat sa iya pagtambong.

-- ADVERTISEMENT --

Ginpaathag ni Mayor Leni nga maayo ang iya relasyon sa nagkalain-lain nga mga simbahan nga indi Katoliko kag mga relihiyoso nga organisasyon sa ila syudad.

Bilang alkalde, ginpahayag niya nga katungdanan niya ang pagserbisyo sa tanan nga pumuluyo sang Naga, ano man ang ila relihiyon.

Apang, gin-athag niya nga nagapabilin siya nga Katoliko kag wala siya sang plano nga bayaan ang iya relihiyon kag pagtuo.