ROXAS CITY – Hugot nga ginapatuman ni Maayon Mayor Raymond ‘Mon-mon’ Malapajo ang ginpaguwa nga executive order ni Governor Fredenil ‘Oto’ Castro may kaangtanan sa pagsuspendi sang quarry operation sa probinsya.
Sa pakig-angut sang Bombo Radyo sa alkalde, ginsiling sini nga gilayon siya nagpahamtang sang tinawo agud magmonitor sa mga quarry sites pananglitan may yara sang mag-operate apisar ginadumilian na.
Aminado si Malapajo nga may nagahinyu nga mga operator nga tugutan na sila magbalik sa operasyon apang wala ini sang mahimo bangud mandu ini nagikan sa gobernador kag kinahanglan tumanon.
Suno diri, antes ginpaguwa ang EO, maid-id ini nga gintun-an sang gobernado agud malikawan ang halit nga posible tunaan kun may yara sang kalamidad.
Dugang pa sang alkalde, nga wala pa sang may naglapas sa amu nga mandu sa banwa sang Maayon.
May yara man sang bulig nga ginatan-ay ang LGU para sa mga pamilya nga apektado sang pagsuspende sang quarry pinaagi sa pagpanagtag sang food packs nagikan sa MSWDO.
