Isa-isa nga ginsabat ni Mayor Mateo Hachuela ang tanan nga isyu nga ginhaboy sang iya kasumpong sa pagka-alkalde sa banwa sang Dumarao nga si Atty. Melgabar Tolentino.
Sa interview sang Bombo Radyo kay Hachuela, ginpanginwala sini nga may pinilian ang iya administrasyon partikular sa mga ayuda nga ginahatag.
Dugang pa sini nga ang region ang naga-validate sa listahan nga kwalipikado sa programa kag ginahatag ini sang patas sa mga pumuluyo sa ila banwa.
Samtang, gindepensahan man ni Hachuela ang bulangan nga nakapangalan sa iya asawa apang, ginklaro sini nga may ara sang pribado nga persona nga nagarenta sa amu nga bulangan kag kumpleto ang tanan nga mga dokumento sa munisipyo kag wala sang bayolasyon nga nakometer.
Ginklaro man sini nga wala sang istorya nga ginpromisa sini ang posisyon sa pagka bise alkalde kay SB member Bodjit Juanico bangud kay Governor Castro ang disisyon kun sin-o ang padalaganon nga Vice Mayor.
Ginpili sang Gobernador ang iya bata nga si Gley Hachuela nga iya man ginkakibot. Magluwas pa nga gin-indorso sang mga kapitanes si Gley sa amu nga posisyon.
Nagbulos man nga nagapapili sa pagka SB member sa ila grupo ang tiyo ni SB member Bodjit Juanico.
