ROXAS CITY – Madinalag-on nga makabig sang alkalde sang Dumarao ang iya una nga 100 diyas nga pagdumala sang ila banwa.
Ini ang ginpahayag ni Atty. Mateo Hachuela, first-termer Mayor, sang mainterview sang Bombo Radyo.
Suno diri, bilang suluguon sang ila banwa, masiling sini nga mabinungahon ang iya liderato bangud sa madamo nga proyekto kag programa ang naimplementar kag iga-implementar.
Kaangay nalang sang pagpakay-o sang dalan sa Brgy. Dangula; Brgy. Bayog padulong sa Alipaciawan; subong man sa Brgy. Gibato kag ang magasugod nga road concreting sa Brgy. Dacuton.
Dugang pa diri ang natigayon nga ma-bid out nga phase 1 sang multi-purpose hall sang Poblacion Ilawod; pagpatuman sang mandu angut sa nagaginutok nga tapangko sa ila merkado; pagplastar sang mga nagapila nga habal-habal kag traysikol sa highway; pagpaubra sang court room sang MCTC; P4-M nga na bid out para sa 8 ka mga market stalls sang Dacuton market; P4-M para sa pag-develop sang fish section sang ila merkado sa banwa; pagpa-repair sang mga eskwelahan nga nagikan sa Special Education fund kag madamo pa.
Pag-abot naman sa mga empleyado ilabi na sa department heads, ginsiling ni Hachuela nga wala man ini sang ginpang-islan kag ginpahanumduman lamang nga kinahanglan wala sang pamulitika sa ila pagpanerbisyo, kag naaprisyar ini sang alkalde bangud propesyonal ang mga mga pinuno sang nagkalain-lain nga departamento apisar nga nagdugay ang mga ini sa nagligad nga administrasyon.
Nagpasalamat man si Hachuela sa mga Dumaraonon nga padayon nga nagasalig kag nagakoperar sa iya mga ginapapanaog nga pagsulondan bangud suno diri nga para ini sa kaayuhan sang ila pumuluyo, agud mapabugal ang Dumarao sa iban nga mga banwa.
