Gina-imbestigaran sang Philippine National Police (PNP) ang posibilidad nga isa ka sniper ang naghimo sa pagpatay kay Rizal Mayor Joel Ruma sa Cagayan.
Sa ginpatigayon nga news conference sa Camp Crame, gin-anunsyo ni PNP Public Information Office Chief Col Radulf Tuaño nga isa lamang ka bala sang kalibre 5.56 ang nag-igo sa tuo nga abaga sang biktima kag naglusot sa likod nga bahin sang iya lawas.
Narekober man ang isa ka empty bullet casing sa lugar nga posible ginposisyonan sang gunman agud tiruhon ang nagapungko nga Alkalde.
Samtang padayon naman ang imbestigasyon sang kapulisan kun nagbayluhanay sang lupok ang 4 ka local police security bangud nahibaluan man nga tatlo ka mga indibidwal ang napilasan sa insidente.
Natalana nga ipaidalom sa paraffin test ang apat ka mga pulis kaupod ang ila service firearms agud mahibaluan kun nagpalupok man sang pusil ang nasambit nga mga indibidwal.
Kaangot sini, nagtukod sang Special Investigation Task Group ang PNP-PRO II agud tutukan ang nasambit nga insidente.
