ROXAS CITY – Nagpaathag ang alkalde sang banwa sang Tapaz angut sa reklamo sang anay punong barangay sang Barangay San Roque, Tapaz nga ginpaidalum sa quarantine matapos nagdeliver sang tubo sa Passi, Iloilo.
Ginpahayag ni Mayor Roberto Palomar nga may balasehan ang ila ginhimo nga pag-quarantine kay anay kapitan Rafael Perez kag mga kaupdanan sini sandig sa kaundan sang Executive Order nga nagapaidalum sa banwa sang Tapaz sa General Lockdown.
Suno sa alkalde nga klaro sa EO nga tanan nga mga residente sang Tapaz nga gikan sa mga lugar nga may nagpositibo sa COVID-19 kag magasulod sa ila banwa ang kinahanglan magpaidalum sa quarantine.
Gin-athag ni Palomar nga indi sini luyag mabutang sa peligro ang kabuhi sang mga Tapaznon gani naghinyo ini nga sundon lamang ni Perez kag sang mga kaupdanan sini ang 14 days quarantine sa diin kun wala sang flu like symptoms nga magtuhaw sa amo nga period, sarang na sila nga mapahanugutan nga makabalik sa ila balay.
Ginklaro pa ni Mayor Palomar nga wala sini ginapunggan ang pag-deliver sang tubo sa Passi, Iloilo apang kinahanglan lamang nga duha ang driver sang trak.
Samtang may yara sang pahanugot sa principal sang Tapaz National High School ang pagtenir sang kapin 29 ka mga persona sa amo nga eskwelahan samtang ginapaidalum sila sa quarantine.
Magaserbe nga temporaryo nga teniran sang mga ginapaidalum sa quarantine ang amo nga buluthuan samtang ginakaayo pa ang daan nga ospital sa Salong nga amo ang nadesisyunan nga himoon nga quarantine place.
