ROXAS CITY – Nagpaguha sang hibubun-ot si Tapaz Mayor Roberto Nonong Palomar angut sa palpak nga pa-obra sang dalan sang kontraktor sa pila ka mga barangay partikular na ang Barangay Malitbog, Switch, San Jose kag Poblacion sa ila banwa.
Sa interview sang Bombo Radyo kay Mayor Palomar, ginsiling sini nga tuman siya ka dismayado sa nangin resulta nga paghimo sang dalan sang CLY-ABC Builders nga amu ang contractor sang proyekto.
Suno kay Palomar, wala nasunod ang gintalana nga deadline para sa amu nga proyekto kag ginapasalig lamang ini sang CLY-ABC Builders nga matapos nga daan apang kabaliktaran ang natabo.
Mahibaluan nga nagsugod ang amu nga proyekto sadtong Marso 5, 2023 kag natalana kun tani nga matapos Disyembre 9, 2023 kung sa diin 52.82% pa lamang ang ila natapos kag yara sang masobra P52-M nga pondo ang gin-alokar ang amu nga banwa.
Dugang pa sang alkalde nga kwalidad lamang sang obra ang iya ginapangayo bangud indi basta-basta ang pondo nga ginagastos para sa pagpakay-o sang dalan.
Bangud sini, gintawag sang alkalde ang atensyon sang region kag district agud mahatagan sang pagtamod ang wala puno kag punta nga proyekto bangud suno diri ang balor nga gingastos sa amu nga proyekto nagikan sa nagabayad sang buwis.
Matandaan nga nagpatigayon sang joint inspection ang alkalde kaupod ang Department of Public Works and Higways (DPWH) kag Municipal Engineering Office sang ila banwa, kung sa diin yara sa masobra 800 meters nga dalan ang liwat nga pagagub-on kag kay-uhon.
