ROXAS CITY – Gamay nalang nga oras kag tinion ang ginahinyo ni LMP-President kag Maayon Mayor Raymond ‘Mon-mon’ Malapajo, sa mga pumuluyo sang ila banwa nga apektado sang guba nga tulay sa Brgy. sang Tuburan.
Sa interview sang Bombo Radyo kay Malapajo, ginsiling sini nga sukmaan ugaling siya kun indi mapakay-o ang amu nga tulay antes magtakop ang tuig 2022.
Dugang pa sini, bilang negosyante, naintindihan niya ang kabudlay nga naeksperyensiyahan sang mga apektado nga mangunguma nagikan sa nagkalain-lain nga barangay, nga indi makaagi ang ila mga salakyan sa tulay, ilabi na nga lapit naman ang tig-alani.
Suno diri, napalab-ot na sini kay Governor Fredenil Castro kag 1st District Congressman Emmanuel Billones, kag nakighinala naman ini sa DPWH agud mapangitaan sang pondo, bangud aminado ini nga indi masarangan sang ila LGU ang pagpakay-o sang tulay, kag may iban pa nga proyekto sa ila banwa.
Matandaan nga naguba ang nasambit nga tulay sang nagpanalasa ang bagyo nga Agaton, kun sa diin, narumpag ini bangud sa tuman ka baskog sang tubig baha.
