Kasubong nga ginpakanubo lamang sang alkalde sang banwa sang President Roxas, ang nangin kaundan sang ginpadala nga sulat sang isa ka negosyante sa Sangguniang Bayan sang banwa nga nagahinyo sang legislative intervention sa ginapatigayon nga clearing operation sa mga makeshift stalls sa merkado.
Sa exclusive interview sang Bombo Radyo kay Mayor Receliste ‘’Tanoy’’ Escolin, ginpahayag sini nga indi matawag nga stall owner ang tagreklamo nga si Antonio Saria III bangud wala sila sang ginpirmahan nga contract of lease sa stall kag arcabala kag ticket lamang ang ila ginabayaran sa gina-upahan nga 140 square meter nga pwesto.
Suno pa sa opisyal kalakip sa ginpatigayunan sang clearing operation amo ang camarin type nga pwesto ukon open space nga may atup sa sulod sang wet market sang President Roxas sa diin ginpatuman lamang sini ang nasaad sa ordinansa nga dapat naka-papag lamang ini kag indi permanente ang istruktura.
Sa 500 ka mga negosyante sa nasambit nga merkado suno sa alkalde, ang tagreklamo lamang nga si Saria ang wala nagtuman sa clearing operation.
Suno kay Mayor Escolin nga may commercial stalls sa merkado publiko kag camarin type nga ginabayaran ang mga negosyante, sa diin nagalab-ot lamang sa P5 per square meter ang balayaran sa camarin type stall.
