ROXAS CITY – Isa-isa nga ginsabat ni Mayor Receliste Escolin sang President Roxas, Capiz ang mga isyu sa ila nga banwa kag ang mga na-post sa social media account sang ila Vice Mayor nga si Braulio Godfrey Botoy Asis.
Sa interview sang Bombo Radyo kay Escolin, ginpahayag sini nga nalipay ang mga empleyado sa iya pagbalik kag nagtambong man ang mga orange ladies sa ginpatigayon nga flag raising ceremony sa una nga adlaw sang iya pagbalik.
Gintuad man sini nga ginpapintahan niya sang bag-o ang plaza nga sandig sa orihinal nga plano sini.
Ang dumpsite sa Vizcaya ang may ara na sang order nagikan sa Department of Environment and Natural Resources nga ipasara kay puno na, kag indi matuod nga nagmando siya nga ipasirado ini.
Sa ginpatawag nga MDC Meeting, ginpanginwala man ni Escolin nga ginhambalan nya ang mga Brgy. Kapitan nga indi mag-attend para wala sang korum kay may ara man sila sang kugalingon nga desisyon.
Pag-abot naman sa SALINTUBIG, nagapati si Escolin nga indi na kinahanglan ang MOA nga dinali-dali ubra kag indi mangin pabor sa mga pumuluyo kay magabayad pa sila sa tubig nga makuha nila.
Suno pa kay Escolin nga mahimo makasuplay sang tubig ang munisipyo pinaagi sa water provider kag ang LGU ang magabayad sa ilavrason nga wala nagapabor ang Könseho.
Samtang, ginpanindugan naman ni Escolin nga siya ang nagpatigayon nga may ara sang artista sa ila nagtapos nga Fiesta sang banwa gani dapat lang mabal-an sang pumuluyo nga may nahimo siya bisan pa suspendido ini.
Sa isyu sang liwat nga pagkasuspendi, ginpahayag ni Escolin nga wala ini sang kamatuoran kay wala man sang mga notice kag mga pending nga reklamo sa iya para masuspender liwat.
Apang, nakabaton ini sang mga istorya nga ang bise alkade ang nagapalapta sini nga isyu sa tion nga makainom kag mahubog sa ila banwa.
