ROXAS CITY – Gintambungan sang mga pumuluyo, empleyado sang munisipyo, barangay kag municipal official ang katapusan nga State of Municipal Address ni Mayor Receliste ‘Tanoy’ Escolin.
Sa iya gindul-ong nga SOMA, ginpabugal sini ang mga proyekto nga naimplementar sang iya administrasyon sa tatlo sini ka termino nga nagalab-ot sa 1.5 bilyon pesos.
Ginpabugal man sini ang improvement sang mga dalanun, pagpahamtang sang mga street light, kag pagpakaayo sang municipal hall.
Ginlakip man sini ang pagbulig sa mga pumuluyo nga ginpahalin sa ila mga balay kay indi ila duta ang ginatindugan sini.
Samtang nadala man sa mensahe sini ang paghatag sang kasadyahan sa ila mga pumuluyo sa tion nga may okasyon ang banwa.
Nadala man sa ginhambal ni Escolin ang mga nahatagan sang financial assistance nga ang pinakaulihi diri ang gin-release pinaagi sa budget sang National Housing Authority nga naapektohan sang bagyo kun sa diin nagbaton ang mga resipiyente sang tag P5,000.
Samtang nagpasalig man ang alkalde nga sa nabilin nga isa ka tuig sang iya termino may ara pa ini nga mga proyekto.
Nagpasalamat man si Escolin sa mga pumuluyo nga nagsuporta sa iya kag nag-upod para mapaumwad ang banwa nga malayo na ang sitwasyon sini kun ikumparar sang wala pa ini nagserbe nga amay sang banwa.
