Pagasabton sang Local Government Unit sang banwa sang President Roxas, Capiz ang ginpadala nga final demand letter sang legal counsel sang pamilya Locsin nga si Atty. Vincent Atlas Catalan.
Ginpahayag ni Mayor Receliste Escolin nga wala sang kaso nga ginpasaka ang pamilya Locsin sa LGU angut sa duta nga ginatindugan sang merkado publiko.
Suno kay Escolin nga indi pa siya alkalde sang banwa may lease of contract na ang mga tenants sa merkado sa diin may naga-exister na nga ordinansa nga dapat magbayad sang rental fee ang mga negosyante nga may stall sa nasambit nga public market.
Gin-athag pa sang alkalde nga nagapati ang mga tenant nga ang tag-iya sang lote nga ginatindugan sang merkado publiko amo ang LGU sang President Roxas.
Nahibaluan gikan sa alkalde nga ang aktwal nga area nga ginatindugan sang merkado ang nagalab-ot sa tres ektarya sa diin humalin pa sang tuig 1956 diri sa amo nga area nagatindog ang merkado.
Ginapanindugan pa ni Escolin nga may nagakaigo nga dokumeto nga ginauyatan ang LGU nga magapamatood nga ang porsyon sang duta nga ginatindugan sang merkado ang gindonar sang pamilya Locsin.
Ginkwestyon man ni EScolin ang ginbuy-an nga pahayag ni Catalan nga dapat sa pamilya Locsin magabayad ang mga tenant sang merkado kag indi sa LGU, bangud ang nasambit nga pamilya ang nagapanag-iya sang duta nga ginatindugan sang public market.
Samtang plano karon sang alkalde nga magpasaka sang disbarment case batuk kay Catalan bangud sa ginahimo nga pagpatalang sa mga pumuluyo kag pagpangharass.
Gindula sang opisyal ang pagkabalaka sang mga tenant sa merkado bangud ipakigbato sii ang kinamatarung sang gobyerno kalakip sang mga tenants nga nakabulig sang daku agud mapasanyog ang ekonomiya sang banwa.
