ROXAS CITY – Nagakinasadya karon ang mga residente sa banwa sang President Roxas, Capiz partikular ang mga supporters ni incumbent mayor Receliste ‘’Tanoy’’ Escolin matapos naangkon ang landslide victory sang partido sang alkalde nga National People’s Coalition (NPC) sa May 13 midterm elections kahapon.
Nangin alagyan ang Bombo Radyo agud mapalab-ot sini sa tanan ang hugot nga pagpasalamat sa pagsuporta sa iya kag sa bise alkalde sini kalakip sa walo ka mga SB members sang ila partido.
Ginpahayag ni Escolin nga wala nakaupang ang madamo nga isyu nga ginahaboy sa iya kag sa iya administrasyon sang ila kasumpong sa pulitika agud mangin madinalag-on ini sa ikaduha nga kahigayunan bangud nakita sang mga pumuluyo ang iya nahimuan sa ila banwa humalin nga ini ang nagpungko sa pwesto.
Nagpasalig man ini sa mga pumuluyo nga padayunon ang maayo nga pagserbisyo sa iya nasakupan sa ikaduha nga termino.
