ROXAS CITY – Nagpahayag sang opinyon ang alkalde sang Tapaz angut sa ginpapanaug nga executive order sang gobernador may kaangtanan sa pagpauntat sang quarry operation sa Capiz.
Sa interview sang Bombo Radyo kay Mayor Roberto ‘Nonong’ Palomar, ginpahayag sini nga kuntani ang pauntaton sa pagpatigayon sang quarry operation amu ang mga iligal, kag magapadayon ang mga wala sang bayulasyon.
Ini bangud apektado man ang palangabuhianan sang mga negosyante nga legal ang ila pag-quarry.
Makaapekto man ini suno diri sa development sang ila munisipyo, kaangay sa mga proyekto nga napauntat bangud wala sang suplay sang bato kag balas, rason nga kinahanglan kuntani sang plano.
Aminado si Palomar nga may mga negosyante nga nagreklamo sa iya angut sa ginpapanaug nga executive order ni Governor Fredenil Castro, apang ginsiling sini nga pagasundon nalang sini ang mandu sang gobernador.
Ginpahayag man sini nga padayon ang ila monitoring nga ginasunod sang mga Tapaznon ang mandu sa gobernador.
