ROXAS CITY – Ginpahamtang sa isa ka lugar ang kapin 480 ka sako sang capiz shells ukon pios nga nakumpiskar sang City Agriculture’s Office kag Roxas City Mayor’s Office sa Sitio Kabulakan, Barangay Cogon, Roxas City.
Ini ang ginpahayag ni Mayor Ronnie Dadivas matapos nagpatigayon sang inspection sa lugar kasunod sang nangin operasyon sang nagligad nga adlaw kag nadakpan ang sinako nga mga pios sa isa ka doog nga wala nalakip sa landing sites nga nakapagkit sa executive order nga ginpaguwa.
Suno sa alkalde nga klaro ang nakapagkit sa EO nga mahimo lamang ma-dungka ang ginsalum nga pios sa tatlo ka mga landing sites nga ginalakipan sa Barangay Libas, Barra kag Punta Cogon.
Ginpa-athag pa ni Mayor Dadivas nga ang tuyo sang EO nga sandig sa rekomendasyon sang city agriculture’s office nga maproteksyunan ang mga marine products kag mabuligan ang magagmay nga mga mangingisda kag mga divers sa ila nga palangabuy-anan.
Nasaad pa diri nga ang ginapahanugutan lamang nga makasalum sang pios amo ang mga residente sang Roxas City kag hugot nga ginadumilian ang mga pangayaw nga mga divers.
Gintumod man sa EO ang magaserbe nga landing sites sang makuha nga mga pios ang ginalakipan sang Barangay Libas, Barra kag Punta Cogon.
Ginpasiguro man sang alkalde nga may nagakaigo nga penalidad ang magalapas sa EO.
Samtang ginpanindugan ni Mayor Dadivas nga dapat bayaran sang mga nagpasalum sang pios ang mga divers nga naghatag sang ila serbisyo, agud mabayaran man ang ila nga pagpangabudlay.
