Dismayado si Panay Mayor Jonathan “Sonny” Besa bangud sa atrasado kag palpak nga Flood Control Project sa Barangay Agbalo sang amo nga banwa.
Ang proyekto ang gin-patuman sa idalom sang Department of Public Works and Highways (DPWH).
Sa interview sang Bombo Radyo kay Mayor Besa, iya ginpahayag nga ang atrasado nga proyekto amo ang nagtulod sa iya nga magsulat kay Vince Dizon, Secretary sang DPWH, agud ipalab-ot ang iya reklamo.
Ang nasambit nga proyekto nga nagabalor sang P68 milyon ang yara sa idalom sang JASA Construction Company.
Sa personal nga pag-inspeksyon sang alkalde, nahibaluan nga yara pa lamang sa 60 porcent ang natapos nga proyekto bisan kuntani magatapos na ini sang bulan sang Marso.
Suno kay Mayor Besa, may mga materyales man nga wala nagasunod sa standard pareho sang balas, graba kag kabilya nga ginagamit sa konstruksyon.
Sa subong, ginhugtan sang alkalde ang pag-monitor sang mga proyekto sa banwa, agud masiguro nga insakto kag de-kalidad ang pagpatuman sini para sa kaayuhan sang mga pumuluyo.
