ROXAS CITY – Ginkumpirma ni House Deputy speaker kag Capiz 2nd District Congressman Fredenil Castro nga isa si Davao City Mayor Sara Duterte sa mga yara sa likod sang pagpahalin kay anay House Speaker Pantaleon Alvarez sa pwesto.
Sa exclusive interview sang Bombo Radyo Roxas kay Deputy Speaker Castro, ginpahayag sini nga antes ang pagsipa kay Alvarez madugay na ang paghinyo sang mga kaupdanan sa Kongreso kay anay Pampanga Congresswoman kag karon House Speaker Gloria Macapagal Arroyo nga batunon ang ila nga rekomendasyon nga bayluhan sa pwesto si Alvarez.
Nagapati ang kongresista nga isa sa mga nagtulod kay Arroyo para batunon ang ginatanyag nga house speakership post magluwas sa pag-endorso sang mayorya sa iya mga kaupdanan amo ang ila pag-estoryahanay ni Mayor Sara.
Suno kay Castro nga ba-se sa impormasyon nga nakalab-ot sa iya nga gintawagan sang alkalde ang mga kilala nga mga kongresista kag ginpalab-ot ang iya nga pag-endorso kay Arroyo bilang House Speaker kabaylo ni Alvarez.
